يا توب قديم مغسول بِهّت
أنا كل أيامي انتهِت
من يوم ما شفتك
ع الحبال
وأنا صبري شال
مكيال نقط
عشان يجَمّع ميتك
شيلتك ف أوقات زنقتك
ساعة ما كنت بتتغسل
وكنت برده خيط ف ابره
اوقات ما كنت بتتنسل
طبعت فيا الوان كتير
خليتها طبعي اللي اتغزل
في توب قديم
كان يوم مكانك
بس داب من فوق حباله
لما مشابكه استندلت
وانا كنت مشبك ليك كتير
دلوقت حالتي اتبدلت
كسرني شَدّك فيا
لجل ما اموت ويا منك
عايز تموت علشان
بهّت ف غسله
من دنيا الهوان
خليك جبان .. يلا انتحر
بس افتكر
انا لسه باقي عليك
وماسك طرف خيط منك
برغم كسري اللي كبر
يا توب قديم
مغسول بٍهِت
لو كل توب فكر يموت
من غسله او شطفه غَلَط
يبقي غِلِط
لانه لو مات وانتحر
غير انه خسران منشره
هيبقي خسران كل حاجه
لإن بموته ده .. كفر
محمد سمير مصباح
